د پنجشېر سیمهییز چارواکي وایي، د روان کال په لومړیو درېیو میاشتو کې له ۲۵۰ زرو څخه ډېر کورني او ۱۲۰ بهرني سیلانیانو د دې ولایت له طبیعي او تاریخي سیمو څخه لیدنه کړې ده.
د پنجشېر د والي ویاند سیفالدین لتون ویلي، سیلانیانو د امن په فضا کې د خواواک، مرغدل، پریان، درې، آبشارونو او د بازارک مرکز په ګډون له ګڼو سیاحتي سیمو څخه لیدنه کړې او یو شمېر یې خپلې شپې او ورځې هم هلته تېرې کړې دي.
هغه زیاته کړه چې د امنیت موجود وضعیت د ولایت بېلابېلو سیمو ته د کورنیو او بهرنیو سیلانیانو د سفر زمینه برابره کړې ده.
د هرات ولایت یو سیلانی، ګلنظر، ویلي چې د لومړي ځل لپاره یې پنجشېر ته سفر کړی او د دې ولایت امنیت، ارامي او د خلکو مېلمه پالنه یې د ځینو بهرنیو تبلیغاتو خلاف بللې ده.
د هغه په وینا، اوسنی امنیت د دې لامل شوی چې کورنۍ او سیلانیان د پنجشېر تر لرې پرتو سیمو پورې هم په ډاډه زړه سفر وکړي.
